اغاني مصطفى سيد احمد (1)

وضاحة
أزهري محمد على

الصباح الباهي لونك
وضاحة يافجر المشارق
غابة الأبنوس عيونك
يابنية من خبز الفنادق
شيدتي في جواي صوامع للفرح
وفتحت في دنياي مسارح للمرح
وبقيتي لى سكة وعيون
لاقدرت أطولك شان اجيك
لاقدرت من غيرك أكون
وأنا بيك مالينى الكلام
حركت بيك عصب السكون
جلبت ليك الغيم رحط
طرزت ليك النيل زفاف
حرقت ليك الشوق بخور
وفرشت ليك الريد لحاف
لا السكة بيك بتنتهي
ولامعاك مليت طواف
ياريتني لو اقدر أكونك
وضاحة يافجر المشارق
الصباح الباهي لونك
يابنية من خبز الفنادك
غابة الأبنوس عيونك






في عيونك
أبو ذر الغفاري
.,
في عيونك ضجة الشوق والهواجس
ريحة الموج البنحلم
فوقا بى جية النوارس

ياما شان زفة خريفك
كل عاشق أدى فرضة
مافي شمساً طالعه طلت
الإ تضحكى ليها برضو

والغمام الفيكى راحل
فى الصنوبر يلقى أرضو
والصباح إمتد يا ما
كل ما جاوبتى نبضوا

فى عيونك ضجة الشوق والهواجس
نشتهيك ياما نحلم
نحكى ليك عن المسافة
وعن سفن بالشوق بترسم
فى بحيراتك ضفافها

عن ملامح غنوة طلت
فى عويناتك هتافها
وعن حقيقة نهاتى بها
فى أساطير الخرافة

فى عيونك ضجة الشوق والهواجس
ياصباحات الموانئ
حتى لو دربك ترنح
فى مشواير الأغانى
والجرح إرتد بينا
لى زمان الآهة تانى

يا نا لا بنتحاشى صدك
لا بتموت فينا الأغانى
يا غنانا المشتهنو
يانى موعود بزمانه
بى مواقيته البرنو
بإرتعاش صرخة وجودك

يوم يطل ميلادى منو
لما إتوسد صباحك
يا تو ليل يفصلنى عنو


لمان يجى الزمن
الفلانى نجاة عثمان

لمان يجى الزمن الفلانى
سمان بتقطر مطر
درى وتمازج برتكانى
نسطر إسمك يا حبيبنا
فى رموش غيم إرجوانى

ندمن الضحك المعافى
نحى فى الفرح المورد
يا سيمينى وإقحوانى

يا حبيبنا جوه عينيك
عايشة ناس
بتسجل الأيام أغانى

والطريق ما ببقى ساهل
ليك بالمعنى المكانى
لما إتحقق زمانى
بمسح الحزن المعشعش
فى عيونك أسمرانى

يا حبيبنا بتحيا
فى حلم الترابلة
فى العلاقات المعانى
فى البقاسى شقى المسافة
وعايشة فى داخلو وبعانى

لما إتحقق زمانى
بشرق الفجر الحقيقة
والصباح الأبيضانى


يا جرح
صلاح حاج سعيد

ياجرح عزة هوانا
الساكنة فى حرف الكتابة
أصلوا فى زمن الأسى المشدود
على وتر الكآبة

فى زمان الحرقة والخوف والرتابة
إنكتم نبض الأغانى
وإنبهم حس المعانى
وإنجرح خاطر المهابة

جيتينى فى الزمن الأليم
وقلبى مثخن بى جراحات الهوى
عمرى ضايع فى متاهات النعيم
فى دروب الغربة لا تاب لا قوى

كان عيونك فيهن الوصف القديم
معنى فى الحب إنطوى
وضاع معاك زمن الوسامة
وإختفى الفرح العلامة
لسة يا حزن الملامة
من سنين دربك سلامة

يا ضلنا يحيى فضل الله

يا ضلنا المرسوم
على رمل المسافة
وشاكى من طول الطريق

قول للبنية الخايفة
من نار الحروف
تحرق بويتات الفريق

قول ليها ما تتخوفى
دى النسمة بتجيب الأمل
والأمل بيصبح رفيق

والأصلو فى الجوف إندفن
لا بتنسى .. لا بنمحى
لا بنتهى منو الحريق

والفينا من آهات اليمة
فى حكاوينا القديمة
لا بيرحل عن عيونا
لا بتخشاه الهزيمة

والقبيل راجنو نحنا
يوم تبشر بيهو غيمة
لما تمطر يوم علينا

الفرح يملأ المدينة
والبيوتات الحزينة



حاجة فيك
هاشم صديق

حاجة فيك
تقطع نفس خيل القصائد
تشده أجراس المعابد

توهتنى .. تعبتنى .. جننتنى

جننت حرف الكلام
وبرضو أدتنى السلام

حاجة فى شرف المدائن
فى غرف كل السفائن
جوه فى عمق المناجم والعيون

حاجة زى ما تكون
محلق فى العواصف
فجأة تهبط فى السكون

حاجة زى نقر الأصابع للوتر
لما ترتاح للموسيقى
حاجة زى أخبار
تناغم من جريدة

حاجة زى وتر الموانئ
لما يصدح لسفينة
حاجة فيك لا بتبتدي
لا بتنتهى

خلتنى أرجع للقلم
وأتحدى بالحرف الألم
وأضحك مع الزمن العريض

وأنسف متاريس الطريق
وأعرف متين أبقى المطر
وأفهم متين أصبح حريق

حاجة فيك


عجاج البحر
حسن بيومى

يراقصنى عجاج البحر
ترعد داخلى الأمطار
يكلمنى تراب الأرض
يشدد قلبى الأوتار

أغنيكم ... أغنيكم

أغنى جذوة النار التى فيكم
وألعن ذلك البرد المدثر
روحكم برماد موتاكم

أغنيكم ... أغنيكم

وأبنى فى عيون الشمس
مملكتى تناديكم
نسوراً تعشق الترحال
فى الآفاق تبغى الكون حرية

فإن شئتم

تعالوا الآن نرقص رقصة البدء

ونعلم أن نمد الكف
نحو الشمس بالدفء

تعالوا أيها الجوعى
تعالوا أيها الفقراء

يا مطر عز الحريق
محمد الحسن سالم حميد

من الواسوق أبت تطلع
من الأبرول أبت تطلع
من الأقلام أبت تطلع
من المدفع طلع خازوق
خوازيق البلد زادت

يفيض النيل نحيض نحن
يظل حال البلد واقف تقع محنة

ولا النيل القديم يا هو ولا يانا
نعاين فى الجروف تِنَهَد ولا يانا
رقاب تمر الجدود تنقص ولا يانا

متين إيد الغبش تتمد
لا قدام ... ولا قدام

تتش عين الضلام بالضو
تفرهد شتلة لا هدام
و لا فيضا يفوت الحد .. لاهدام

يا مطر عز الحريق
محمد الحسن سالم حميد

عقب يا نيل تكون يا كا
ونكون أهل البلد بالجد

يا مطر عز الحريق
يا مصابيح الطريق


وجيدة قريب اله محمد عبد الله

بعيد عنى
خطاك ما لامست وجه الطريق
ومشيتى ...... ومشيتى
لا فوق غيمة
لا ظنى ... بعيد عنى
كأنك من وراء صفحة زجاج مبلول
وراك الريح وقدامك
مدى السكة وندا المجهول
أنادى ليك ... وأنادى ليك
وجيدة ..... وجيدة
لا إتلفتي لا لوحتى بى إيديك
أنادى ليك
يجاوبنى المدى الفاتح مدارج الهم
بتبقى وجيدة طعنة سيف
موسدة فى شق السما المرسوم
وسادة دم
وتبقى إيدينا فى إيديك
وفى شعرك وفى المنديل
وفى إيديك بعيد عنى

نشوة ريد
قاسم أبو زيد

نشوة ريد
إحساس إكليل
وردة وصلك جنة أصلك
نجم الليل الوصل جميل

نحنا مشينا الخطوة الأولى
وإنت معاى مشوارنا بيقصر
بكرة بنحكى الشوق للذكرى

نار الريد الغابت تظهر
الأطفال يا فاطمة بغنو
الأفراح لا بد من ترجع
الأحلام الدونك فاتت
لو واصلنا صباحا بيطلع

نشوة ريد إحساس إكليل
وردة وصلك جنة أصلك
نجم الليل الوصل جميل

هردت لهاتى محمد الحسن سالم حميد

سنى على النضال إيدي
سوكي بالهتاف فمي
شوارعك لي دويها على
إذا ما آخر العلاج الكي

مراويدك حمر حمي
هردت لهاتي بالغنوات
وقت يبرد حشاك يمي
من التعب البلا صالح

تفيقي .. تروقي .. تنجمي
تسوي مكانسك المطرة
تضوي البيت وتنحمي
تمرقي صبوحة للجيران

قدح فوق إيد وفي إيد المي
يلاقوك شفع الكتاب
ونصاف وظراف بلا النسمي

هردت لهاتى
محمد الحسن سالم حميد

يغنولك غناوي الساب
وفي بيوضة ما في سراب

جبال كجمي وفيافي الكاب
تمر بالخضرة منقسمي
فيافي الصحي وبيوضة ..
المراسم فيها مفروضة ..
خضارة يراري شوف عيني ..

على الأبواب قماريها .. طواريها
جواريها .. بقت روضة
بقت تشرب من الحمداب
تشوفي رهاب بعد نجمي
وأشوفو قريب قرب نضمي
أشوف العالم التحتاني هيلاهوب

هد عمايد الفوقاني جو الجب ..
رمي العارض وقف ناهض
وفي السابو الدمار أفراد
عريق الحب نبض قابض
مثل فيض الحروف أسمي

هردت لهاتى


وغناوينا القبيل رقراق
علينا تصب برد قارص
واجر نمي .. وأداوي لهاتي بالقنوات
عقب يبرد حشاك يمي

وطني ولا ملى بطني
سكاتي ولا الكلام النى
بليلتي ولا ضبايح طي
قليلتي ولا كتر سمي

سلام يمي
سلام لا هكمي ولا دكمي


ماطال في بحرك في مي محمد الحسن سالم حميد

ماطال في بحرك في مي
وتمرك مفدع بالجريد
شدرك أمد حس السمي

طينك معتق بالطمى
نبنيك اكيد نبنيك جديد
نبنيك ايوا سوا سوا
منو وجديد نبنيك جديد

يا إيد ابوي على إيد أخوي
على إيدنا أنا
عى إيد وايد نجدع بعيد

في لجة من راس ميضنة
حكومة الفقر الدمار
الفخفخت والصهينة
واللي نقاص ايامنا كاس

ماطال في بحرك في مي
محمد الحسن سالم حميد

اليالطيف سوس البحر
نرجم قفاهو حجر حجر
من ها الرصيف
الما قدر قدام
سريحة الموج يقيف
الما انستر
الأرزقية وناس مو يا
نسقيها كاس اسقتنا يا
نوريها كيف عشق الحياة
سنانا فوق حجر القصاص
سنانا ناس ضرب البحر
جوانا احر من الرصاص
ياضو حبيبين القسا
طول ما انت غرقان في الأسى
تبت يديك ما ترمي ساس
ماتبني مجدك من جديد
تفتح شبابيك الخلاص
تدخل نسيمات النشيد
بيت القصيد يستقبلا و مستقبلا
والحاضر الماضي التليد


يابلدي يافردة جناحي التاني
وكت الناس تطير لي عالما
وا فجعة الزول البجيك
مايلقى فيك غير الهجير
ناسا تواشني مسالمة
كل البشاشات القبيل
يلقاه ميتة مسممة
والجاتا جاتا من الارض
ما جاتا من تالا السما
مااعتى غبنك ياولد
واعدل قضيتك وأعظما
لاترجّع السيف الجفير
والدنيا فايرة مصادمة
من غير تجيب تار البلد
ريح العوارض تهزما
وتطرد مع إبليس الأخير
دعة الضلال من جنتك يا آدما
تاكل من الشدر الحلال
يغشاك نعاس في ضل رمى



تحتاك هضاريب الصعب
كربة ليالى الَمظْلمة
يا نيل قُبل خاطرك يطيب
أرضك تفذّع باللهيب
تكشح تواريب الغضب
صعب المِراس
نوبة وزنوج بجه وحلب
رطانة عربان مواشو
ومولدين تلقانا أو
نلقاك ضوء
ضلمة لياليك العِجاف
رشة نهاراتنا النشاف
آمنا بيك وموحدين
في إيدنا فاس… وقلم رصاص
شتلة وكمنجة ومسطرين
وطبنجة في خط التماس
حرآسة من كيد البكيد
ضد الرصاص والإنتكاس
نبنيك جديد واشد باس