مقتطفات من روائع الشاعر القدير/ التيجاني حاج موسى

من طرف **nice angel** الخميس ديسمبر 31, 2009 8:05 pm

أمي

أمى .. الله يسلمك
ويديكى لى طول العمر..
وفى الدنيا يوم ما يألمك ..
امى .. الله يسلمك ..
* * *
أمى يا دار السلام
يا حصنى لو جار الزمان ،
ختيتى فى قلبى اليقين
يا مطمنانى .. بطمنك
أمى .. الله يسلمك
***
خيرك على بالحيل كتير ،
يا مرضعانى الطيبة بالصبر الجميل ،
سا سعد أيامى وهناى
لو درتى قلبى ، أسلمك.
أمى .. الله يسلمك
***
أنا مهما أفصح عن مشاعرى
برضو بيخونى الكلام
وقولة ( بحبك )
ما بتكفى وكل كلمات الغرام
يا منتهى الريد ومبتداه ..
يا الليا .. الله يسلمك ..
ويديكى لى طول العمر
وفى الدنيا يوم ما يألمك ..
أمى .. الله يسلمك ..

الماضي
وجايى تفتش الماضى ؟
خلاص الماضى ولىَّ زمان ،
وجفت مقلتى الباكية ..
ونامت من سنين أحزان ،
وجاى تفتش الماضى ؟
**
أرجع بالزمن مرة وأتذكر حكايتى معاك ..
تلاقى القصة – جد – مره
هل راعيت شعور مضناك؟!
كلما تزيدنى فى هجرك
أقول ليك زيدنى ما أحلاك
لا شفع التوسل فيك .. ولا حرمانى يوم هماك
وجاى تفتش الماضى ؟
وجيت تترجى بالدمعات...
أسامحك أنسى أغفر ليك ؟
جفف دمعك الغالى ..
مسامحك وما عشان عينيك..
عشان تتعلم الغفران..
وتصفح لو زمن جار بيك
وحاول لو قدرت كمان
تقدر رقة الحابيك
وجاى تفتش الماضى ؟
وعزة نفسى مابيه على
أسلم قلبى ليك تانى..
سنين الهجر بيناتنا
وحاجات تانية حاميانى
ولو رجع الحنين وعاود
وليك من تانى ودانى
ولو مكتوب ليَّا تانى أحب
بحب إنسان يكون تانى

شقا الأيام
شقا الأيام ..
وسهر الليل ..
بهون لو مرة حسيت بى ..
يزول كل الوجع وأرتاح ..
وأغرد زى كنار صداح ..
وتبقى الدنيا فى عينى ...
أزاهر وغيمة وردية ..
ولو سلمت مرة على ..
سلامك ليا عيديه...
**
شقا الأيام وسهر الليل ..
وآهاتى الحزاينية ..
ملازمنى من يوم شفت عيونك الحلوة ..
ويومها عرفت كيف العين
مكامن ريد..
وجرة نمة من دوبيت ..
ضراعة فاتحة يوم العيد
فرح أطفال
وأهازيج زار
ونقرة طار ..
وبحة ناى ...
حزين غناى ..
ترانيم غنوة دينية
**
براى ... والليل
وأهاتى الحزاينية ،
بيغشاني النعاس مرات ..
وطيفك يمر..
يغافلني..
يبدل حزني اشراقات
وأبداء معاك غناوى الليل
وأغالب الدمعة مابيه تسيل ..
أتارى الليل كمل كلو ؟!
عيونك مرة لو طلو ..
يزول كل الوجع وأرتاح...
وأغرد زى كنار صداح..
وتبقى الدنيا فى عينى ..
أزاهر وغيمة وردية ..
ولو سلمت مرة على ..
سلامك ليا عيدية ..

حبايبنا
حبايبنا
قرايبنا .. وتخاصمونا
وخصامكم لما زاد طول
ولمن أنتو فى الأول جرحتونا
قلنا أقلو نتلاقى
تعاتبونا...
تلومونا....
وفى الأخر تصالحونا .. حبايبنا
تغلطوا انتو ونسامح
ما بنقدر نخاصمكم
ما اصلو الهوى الجامح
بينسينا الخصام كلو
ويهون ظلم الهوى وذلو
والضقناهو من مرو
لما عيونك الحلوين تصابحنا
نرجع نحن مجبورين
نسامحكم ..... حبايبنا
ولمن زاد خصامكم لينا فات حدو
والقايلنو ببقى هظار
أسفر لينا عن جدو
بحر ريدكم وانتو بعاد
يوماتى بيزيد حدو
ولما عيونك الحلوين تصابحنا
نرجع نحن مجبورين ،
نسامحكم .... حبايبنا
وقرايبنا ،
وتخاصونا

أظلم من ظلم
كم شفت من مجهول مصير
وشفت ياما شفت كم
انا شفت ناس ظالمين كثير
بس أنت أظلم من ظلم
انا تانى ما بندم عليك
اصلو الندم بيفيد شنو ؟!
ولمتين انا اترجى فيك
الزيى كان رادك منو ؟!
لكن طباعك يا ضنين
لكن طباعك ما بتلين
جفوة ونفور وعذاب وسنين
وعمرو قلبك ما رحم
انا شفت ناس ظالمين كثير
بس انت اظلم من ظلم
**
يا دنيا ياما فيك ناس
بتقابل الريد بالجفا
يا دنيا ياما فيكى ناس
اتعلمت قل الوفا
ويا دنيا ياما فيكى ياما
وياما فيكى وبس كفى
آه من جفاك .. خليت شنو
انا شان رضاك
يا العمرو قلبك ما رحم
انا شفت ناس ظالمين كثير
بس انت اظلم من ظلم

فات الأوان
من بعد ما فات الأوان ،
الليلة جاى بتعتذر ...
بترجع أيامنا الزمان ،
من وين نجيب ليك العمر ؟؟
**
وفرحت بيك .. مديت دروب الريد سماح
وغزلت ليك ، طيبة مشاعرى غطا ووشاح ..
لكنى وآضيعة رجاى
رديتنى مكسور الجناح ..
وسقيتني بعد الحلوة مر
من وين أجيب ليك العمر؟؟
يا البى غرورك كم قسيت
كان ظنى فيك تكون حنين ..
غالبت أحزاني ومشيت ..
فى سكة الشوق بالسنين
وبراى بالنار انكويت
وصليتني بعد الفرقة بين
لحد ما كمل الصبر
من وين أجيب ليك العمر؟؟

واحشنى
واحشنى يا الخليت ملامحك ..
فى حياتى ،
واحشنى يا الرسيت مراسيك ..
جوة ذاتى ،
الا باكر لما ترجع ،
أنا بحكى ليك عن الحصل ،
وعن بعد المسافة وقربها
ولمن يفارق زول عيون
غاليات عليهو كتير خلاص وبحبها
والله أحكام يا قدر
والله أحكام يا مسافة ويا سفر
***
وانت لما بتسيبنى وتسافر
خت فى إعتبارك ،
انو دنياى فى مدارك
وجد- لفافات الصبر دخنتها
وكل المقاطع فى غناى طوعتها
وغريبة غنت ،
فرحة ... لا ... لا
غربة ..لا....لا
تقصد شنو ما عرفتها
وأهى تجربة .....
خطيرة – جد – وأجتزتها
ولسة واحشنى

طلع الصباح
أطرد النوم من عيونك
ما خلاص طلع الصباح
خلى بالك للبخونك
يلاحى على الفلاح
***
وابدأ أول خطوة أمشى
الطريق لسه طويل
لسه قدامك مسافة
الف فرسخ والف ميل
وانت يا سودان قيافة
فيك تراب راويهو نيل
وانت يا سودان ثقافة
من زمن دقنه وخليل
نادى أولادك وأصرخ
غربتم طالت سنين
وأفتح أحضانك وأفرح
وضمهم بس بى حنين
واوعى تطلع كلمة تجرح
وتانى نرجع للانين
والزمن يسرقنا يسرح
وتانى يسلبنا اليقين
***
خلى بالك للمدارس
خلى بالك حصة حصة
وللكراريس أبقى دارس
والدرس نقراهو هسة
للفصول خليك حارص
ما تضيع فيها قشة
وللتلاميذ أبقى حارس
همه طينة ولسه هشه
الصبر هد الجبال
وانت صبرك ما اعتيادى
وخلى ضراعتك طوال
توصل القرى والبوادى
لمهم لمة رجال وطوف بلاد الدنيا نادى
وعلمهم كيف النضال
وافتخر قول ديل ولادى

من طرف **Admin** الجمعة يناير 01, 2010 12:38 am

شكرا شكرا وتسلم الايادي, فعلا روائع تكتب بماء الذهب.

لك الشكر وكل التقدير

من طرف **احمد** الجمعة يناير 01, 2010 1:00 am

يسلمو يا غالي

وفي انتظار جديدك

يا غالي

مقتطفات من روائع الشاعر القدير/ التيجاني حاج موسى

مقتطفات من روائع الشاعر القدير/ التيجاني حاج موسى

رد: مقتطفات من روائع الشاعر القدير/ التيجاني حاج موسى

رد: مقتطفات من روائع الشاعر القدير/ التيجاني حاج موسى