واحدة بواحدة

من طرف بت البلد الجمعة يناير 22, 2010 7:45 pm

عوض : هوي ياحضرة الاستاذ .. قلت لينا كان صوتنا بتدونا شوال سكر .. واها صوتنا ..

حضرة الاستاذ :وصوتا لمنو ؟

عوض : مالي لي زولكم دا ..

الاستاذ : وزولنا دا ماليهو اسم ..

عوض :يازول هوي .. انت قلت لي تلقاهو في الصفحة الاولى الاسم الاول..

الاستاذ: يعني لو الاوراق اتلخبطت ..تصوت لأي واحد ؟

عوض : الله يطولك ياروووح .. انا قلت ليكم يازول انا امي لابعرف اقرى لااكتب ..هسي ادينا سكرنا خلينا نمشي ورانا مصالح ...

الاستاذ: اديك السكر كده طوالي كده .. مانتاكد الاول انك صوتا لينا

عوض: اها وتتاكدوا كيف؟

الاستاذ: لمن مرشحنا يفوز..

عوض : وافرض مافاز .. يضيع علي السكر ..

الاستاذ : يازول قول خير .. نحنا ضامنين الفوز .. ان شاء شوال سكرك حجيك لحدي باب بيتك ..بس استنى لحدي يوم النتيجة .. انت بس شيل لينا الفاتحة ياحاج ..

عوض : ان شاءالله ..( وصوت منخفض وغير مسموع) ..يشيلكم الله ويريحنا منكم ..

... وبعد النتيجة ....

عوض : حضرة الاستاذ ..حضرة الاستاذ .. ان شاء الله خير..

الاستاذ: والله ياعوض اقول ليك شنو.. الله مااراد .. شكلك كده مادعيت لينا من قلبك .. الله يعوض عليك في شوال السكر .. ان شاالله المرة الجاية ..

يقاطعه عوض : لامرة جاية ولا مرة ماشة .. اساسا انتو كان جادين صحي كان اديتونا السكر من يوم ماصوتنا ..

الاستاذ : والله ياسيد دا نظامنا كده .. يعني نديك السكر ونخسر..

عوض : يازول نظامكم كده نظامكم كده .. انا ذاتي نظامي كده .. ورميت الورقه فاضية ..

الاستاذ : انت مجنون .. رميت الورقة فاضية ليه ..

عوض : والله ياسيد دا نظامي كده يعني اصوت ليكم وماتدوني سكر..