الحل لمشكلة العنوسة في السودان

من طرف بت البلد الإثنين يناير 04, 2010 4:29 pm

سيدي الوزير:

كما هو معروف فأن الأسرة هى أساس المجتمع، فمنها يبدأ، وعليها يعتمد، وبقدر ما تكون الأسرة مترابطة بقدرما يكون المجتمع قويًّا مترابطًا وأن والزواج هو الوسيلة المثلى الوحيده لإشباع حاجات الأفراد النفسية والجسدية ولقمع الشهوات والإنحراف والشذوذ حتى يستقر المجتمع ويحقق أهدافه وطموحاته !

على الرغم من هذا الإستجواب الذى تقدمت به العضو (حسنات القطر فات) عن (طريق ريئس المجلس) لوزير (الأسرة والمجتمع) إلا أن (الأخير) قد (تملص) عن الحضور للإجابه على الإستفسارات الذى تقدمت به العضوة المحترمة متعللا بإنشغاله الدائم ولم يكن هذا (الزوغان) إلا لعلمه فى قرارة نفسه بأن وزارته قد فشلت فشلاً ذريعاً فى وضع وتنفيذ أى خطة لمجابهه هذه الظاهرة الخطيرة غير أنه قد قام شخصياً بالإتصال هاتفياً بالآنسة (حسنات) داعيا لها حضور إجتماع بمكتبه لمناقشة الأمر بدلاً عن مناقشتة على الهواء (أو كما قال) !

حضرة الوزير:

إنتى يا أستاذه عاوزانى أجى المجلس ارد على إستجوابك ده أقول شنو؟ نحنا قصت زيادة نسبة العنوسة عارفنها وملاحظين ليها لكن ما عارفين نعمل معاها شنو؟ جربنا حكاية العرس الجماعى دى وفشلت

- لكن ما لازم كان تفشل يا سعادتك .. هى القصة (شنطت شيله) وكم توب وكم فستان وإلا القصة (فتح بيت) وتكوين أسرة !!

- قلنا برضو نحل المشكلة بالتعدد يرضو ما إتحلت

- لكن يا سعادتك تتحلا كيفن إذا الناس المرتاحة العاوزة تعدد دى بتعدد بالبنات (السغااار) وحلوااات وتخلى (الكباار) الزينا ديل !

نائب الوزير:

- طيب أيه رايكم لو بقيت (حاوى) وحليتا ليكم أدونى بس يومين وإنتو ح تشوفو براكم

بعد يومين :

ما أن رأى أفراد شلة الضمنة الذين كانو يجلسون تحت ضل النيمة عم (خضر) يتجه نحوهم ممسكاً بجريده فى يده حتى بادروه :

- أها طابق الجريده دى فى ايدك الليلة معناتا جايب خبرن عجيب وغريب !

ما أن وصل عم (خضر) إلى حيث يجلس الجميع تتوسطهم تربيزة الضمنة حتى تهالك جالسا على (البنبر) :

- الغرابه الشوية دى ؟ إنتو قريتو الليله جرائد؟.. اسمعوا

خطة للقضاء على العنوسة : إستيراد ألف عريس من الصين كدفعة أولى... [ندعوك للتسجيل في المنتدى أو التعريف بنفسك لمعاينة هذه الصورة]

أم البنات :

بينما كانت (نفيسة أم البنات) تجلس مع جارتها (محاسن) وهن يتناولن (الشاى) ويشاهدن التلفزيون إذ تمت إذاعة الخبر :

- ما سمعتى يا نفيسة الكلام القالوهو ناس الحكومة ده ؟

- كلام شنو ؟

قالو ليك ماشين يستوردو ليهن عرسان من الصين الما قريبه دى...

(نفيسة) تغادر منزل جارتها (محاسن) مسرعه وتدخل إلى منزلها حيث تجد بناتها الخمسة جالسات يشاهدن فى القناة الفضائية يضعن المساحيق على وجوههن ويمسكن بالمرايات يتطلعن لوجوههن ...

- أيوووى يوووى يوووووى ...!! [ندعوك للتسجيل في المنتدى أو التعريف بنفسك لمعاينة هذه الصورة]

- مالك يمة بتزغرتى ؟

- الحكومة فتحت الإستيراد !

- بتاع الكريمات

- كريمات شنو يا غبيانه .. بتاع العرسان .. وحاتكن قالو تانى بت تفضل عانس بلا زواج مافى

- ويجيبوا لينا عرسان قدر ده من وين؟

- والله قالو إستوردو ليكن جنس عرسان يا حلاتن ذى (حجارة البطارية) ده من ده ما تفرزيهو !

مؤتمر صحفى :

طبعن يا جماعة كولكم عارفين إنو عرس بقى مافى فى ظل إرتفاع تكلفة المعيشة وإنعدام فرص العمل وضآلة المرتبات وإنو تبعاً للحاصل ده إرتفعت مشكلة العنوسة بشكل رهيب وده طبعن ح يكون عندو آثار سالبه على المجتمع على المدى البعيد عشان كده يا جماعه الدولة فكرت فى إنو تحل المشكلة دى حل جذرى !

نحنا إتفاهمنا مع أخواننا المسئولين الصينيين ولقينا إنو عندهم نسبة عنوسة كبيره وشباب كتيرين ما قادرين يتزوجو عشان الزواج هناك تكلفتو باهظة وبتحصل ليها 75 ألف دولار قلنا ليهم خلاص مافى مشكلة نحنا أصلو علاقاتنا مع بعض (سمن على عسل) وإنتو أصلو عندكم شركات كتيره شغاله هنا عندنا نقوم بالمرة نستورد منكم عرسان يعرسوا مننا ويشتغلو فى الشركات دى ! بس على شرط يكونو (مسلمين) والحمدلله الأخوة المسئولين الصنييين وافقوا على القصة دى وطوالى وقعنا إتفاقية (زواج مشترك) وح نبدأ المسالة دى بى (ألف عريس) كمرحلة أوليه لحدت ما نقضى قضاءا مبرما على مشكلة العنوسة دى ! – يلملم أوارقو ويلتفت للحضور - :

- ده كل الكلام العندنا فى الوكت الحاضر ... فى أى زول عندو أى سؤال أو إستفسار

- أيوه سعاداتك الحقيقة سؤالى هو : (ألف عريس) دى يا سعادتك ما شويه ؟ نحنا فى (حلتنا بس) بيكون فى ألف عانس !

- الألف ديل بس دفعة أولى وإن شاء الله تكون فى دفعات تانية وتالته ورابعه لحدت ما نقضى أقصد نعرس لى آخر عانس !

- والله الحقيقه انا عاوز أسأل سعادتك يعنى هل برضو ح تحلو مشكلة العنوسة بالنسبة للأولاد ذى ما حليتوها بالنسبة للبنات !

- والله أنحنا (الأولاد ديل) عملنا ليهم إعلان فى الصحف الأجنبية عشان نصدرهم بره (كعرسان) لو فى زول محتاج ليهم لكن لسه ما جاتنا أى طلبيات !

- سؤالى سعادتك هو : هل الدولة وحدها هى الح تتبنى المشروع ده وإلأ ح يفتح للقطاع الخاص ؟

- والله نحنا قلنا ضربة البداية دى نقوم بيها نحنا وبعدين الشركات الخاصة ممكن تكمل المشوار

ودخلت الشركات :

إمتلأت الصحف بإعلانات الشركات التى دخلت مجال إستيراد العرسان (شركة نصف الدين لإستيراد العرسان المرطبين) ، وقد تخصصت ى إستيراد (عرسان) ذوى كفاءة مالية تتناسب مع عوانس (الطبقات العليا) ، شركة (ليسكنوا) للعرسان العاديين العاوزين (يسكنو وبس) ، شركة (عريس السرور) وكذلك شركة (عريس الكرور) والتى تقوم بإستيراد عرسان (قدر ظروفك) وقد فضلت بعض الشركات أن تقوم بالإستيرا فقط على أن تتولى شركات تجزئة القيام بمهمة البيع للجمهور !

فى سوق (سعد قشرة) تجمهر عدد من المواطنين أمام شخص يصيح بواسطة مايكرفون محمول وهو يضع أمامه عدد من العرسان الصينيين .. على عشرة .. على عشرة .. على عشرة صينى مية المية وأهو ده الباسبورت .. والواقف داك المأذون .. عريس ميه الميه وأهى دى الشهاده الصحية .. لا بساهر (بره) لا بجيب ليك (ضره) .. علينا جاى ..

- عليك الله يا ود أمى قول للواقف فى النص ده قبل جاى خلينا النشوفو كويس

- ده ؟ اللابس الجينز ده ؟

- ............................

- الوليد ده شغال شنو؟

- ده يا حاجه ما وليد ما تشوفيهو (سغيرونى) كده .. ده إسمو (وانغ يانغ ليو) وعمرو 39 سنة وشغال(فنى بتاع تبريد وتكييف) !

- أريتو عريس الهنا شوف الشعر نازل لى جبهتو كيفن – تلتفت نحو بنتها التى تقف خلفها – تعالى يا بت شوفى العريس ده بنفع معاكى !

- (تنظر إليه متفحصة) : قصير يا ماما .. قصير

- ويجيبو ليكى صينى طويل من وين؟ ما ياها دى البضاعة الفى السوق !

- (البائع يلتفت نحوها ) : خلاس يا حاجه ما مشكلة بكرة تعالى جايانا بضاعه Xlarge بكره !

على مقربه من البائع السابق كان آخر يصيح (بدون مايكرفون) وقد تجمع حوله عدد كبير من السيدات تتوسطهن (نفيسة أم البنات)

- تعالااا بص ... بإتنين ونوص .. تعالااا بص ... بإتنين ونوص .. جابوهو بالطيارة وباعوهو بالخسارة .. أهو ده المأذون وأهم ديل الشهود .. تعالااا بص ... بإتنين ونوص .. تعالااا بص ... بإتنين ونوص

بينما عدد من (العرسان) يجلسون القرفصاء على الأرض ينظرون فى وجوه التى إزدحمت لتراهم ..

- ما بدتدينا يا ولدى (الخمسة) البى جاى ديل بى عشرة؟

- يا حاجه والله ده ما راسمالهم !

- (بناتها الخمسة يتشعبطون من خلفها فى محاوله لرؤية العرسان) : يا حاجه والله أخير لينا بورتنا دى .. عرسان شنو ديل الواحد قدر أنبوبة الغاز!

- (البائع) : إنتو يا حاجه عاوزين تعرسوهم وإلا تشدو فيهم (حلة) ؟ ديل أقل عريس فيهم (مهندس بترول) دخلو فى اليوم الشئ الفلانى .. قايلنهم ذى اولادكم ديل الواحد قدر الحيطة واليوم كلو نائم !

على واجهه شركة (راسين بالحلال) للإستقدام تم تثبيت لافتة قماشية كبيره كتب عليها بخط جميل ملون (يا ناس يا عسل العريس الصيني وصل) , تزاحم وهرج شديدين أمام مدخل الشركة مما دعا البوليس لتنظيم الصفوف

- والله أخير لينا بورتنا من الزحمة والمدافرة دى

- يا بت إنتى جنيتى؟ بورت شنو الأخير لينا والله كان قالو ليا أقيفى فى السراط المستقيم الليله أقيف ! هو نحنا صدقنا نلقى لينا عريس

- والله أنا خايفه يكونو مضروبين ذى بضاعتم الفى السوق دى !

- مضروبين ما مضروبين أنا حالفه الليله ما أرجع إلا شايله معاى عريس قابضاهو فى أيدى دى !

بعد 40 سنة :

سيداتى أنساتى سادتى من إستاد الخرطوم الدولى يسرنا أن ننقل إليكم وعلى الهواء مباشرة المباراة الختامية لكأس الدورى الممتاز والتى تقام بين فريقى (التنين الاحمر) و(نجمة بكين)

كما تعلمون سيداتى وسادتى أن فريق (التنين الاحمر) قد وصل غلى هذه النهائيات بعد فوزه على فريق المريخ 5/صفر كما أن فريق (نجمة بكين) قد وصل بدوره إلى هذا النهائى بعد تغلبه على فريق الهلال (6/1) .. يدير المباراة حكمنا الدولى (شانغ فونغ لى) يعاونه فى الخطوط ( فينغ فو دان) و(وانغ فو لينغ) بينما يجلس كحكم رابع الحكم الدولى (شنغ فانغ شانغ) .. الآن سيداتى وسادتى يتقدم السيد (ليانغ لى فونغ) وزير الشباب والرياضة يصحبه السيد (شونغ فانغ لى) معتمد العاصمة القومية لمصافحة اللعيبة ...

الآن فى هذه اللخظة يطلق الحكم الدولى (شانغ فونغ لى) معلنا بداية المباراة .. الكورة مع فريق التنين الأحمر ... اللاعب فونغ وانغ (زرديه) بيلعب باص طويل جهه شونغ فانغ (طحنية) بيقطعا اللاعب شان لى فونغ (نملية) وبيعمل معاهو (فاول) ، الحكم بيديهو بطاقه (حمرا) ، ، يتوقف اللعب الآن وحتى يتم إخراج اللاعب من الميدان سيداتى أنساتى سادتى أشكر إنابه عنكم الفريق الإذاعى العامل الذى يقوم بنقل هذه المباراة لكم على الهواء مباشرة :

فى هندسة الصوت : شينغ شي تاو

على عربة النقل الخارجية : يانغ ياو شانغ

فى الإخراج : دونغ يونغ شاو

وينقلها لكم .. محدثكم : هوانغ ليانغ لين

هتافات الجمهور تتعالى : شانغ تشيو شونغ تشاو ....(التحكيم فاااااشل

منقول بتصرف...

من طرف **Admin** الإثنين يناير 04, 2010 7:36 pm

شكرا لك بت البلد على المساهمة الرائعة. هههههههههههههههههههههههههههه

من طرف **بت الشاطئ** الأربعاء يناير 06, 2010 6:55 pm

أهلن وسهلن بيك

يا بت البلد

موضوع جميل اضحكني

كثيرا وذكرني بنكتة العرسان
فى شريط الفرقة الكوميدية

لك التحية بانتظار ابداع آخر من ابدعاتك

الحل لمشكلة العنوسة في السودان

الحل لمشكلة العنوسة في السودان

رد: الحل لمشكلة العنوسة في السودان

ما أروع ما نثرتيه أختي