وطن طيب

[color=black][center">وطن طيب

بنيتك ياوطن دوبيت
وكان الساس..
عيون أهلى.. وسماحة الناس
عرشتك بالأغانى مروق
دقة طار ورنة عود
وصوت ربابة لما القمرى
يصدح قوق
زرعتك ياوطن أفراح
غرستك فى تراب الشوق
سقيتك بالمحنة كلام
معطر بى حروف الذوق
وكل ما أكبر انت معاى
بتكبر فى الأعالى الفوق
بنيتك ياوطن صوفيه..
من ذكر الله تسقى الرى
خلاوى الفقراء والتقابه
فوق لى نورا زادت ضى
ونوبة العصرى لما تدق
يلف درويش.. وتسمح حى
وحى قيوم ..
ولما خلاص يفوت اليوم
يجيهم ليل
وليليك ليلى ..ليل القوم
نار قرآن .. ونور رحمن
وخوف انسان
يهاب المولى جد بالحيل
والصوفيه ناس الحكمة ناس الرآى
قلوب بيضاء.. وطواقى خدر
يعالجوا الزول يمرقوا الضر
باذن الله والصآفات
وسورة صاد
والصوفية ناس اللوح..
ناس السبحة والأوراد
مسيد سيدى .... ومحاية الشيخ
والمهيوبة كانت زاد
بنيتك ياوطن سودان
رجال الضايقة لما تحل
تروس الدمعة يوم تنزل
بدفنوا الفرحة فى الوجدان
صقور الجد .. خلاصة الضو
ناس طوالى ما بعدين
ويلا أرح .. وهسى التو
بعدلوا الراس .... وأشيلوا الراس
كان الرآس خلى الدغرى واتلولو
رجال بالجد ...
بحبو الستره والضيفان
ناس طلق تخشو البيت
وتبقوا هناك على الديوان
تأكل زين وتتونس
كان العرفه ليها زمان
وانت الجيت وليك ساعات
تعد الحالة زى البيت
تقول الجبنة بالكباية..
ماتجيبوها بالفنجان
تعد الحالة زى البيت
تخش وتفوت
مابتشوفوا ضل نسوان
ناس سعدية بت الزين..
مع البلامة كاسرة العين
مكحلة شوق...
محدقة ذوق ...
معطرة من دعاش الطين
كريما وضو ..
وبدرة وشها الضوآى
تراب السجدة فى الواطة
اكان مصلاتة مشغولة
وخافت من صلاتا تفوت
وهابت من حساب بعدين
واوعة تقولو عهدا فات
لسع نحن فينا الريف
لسع بلدنا فيهو التقوى
فيهو العفه ... فيهو السمحه
ذات الدين
وآآهه ياليلى بت العم
ريدك ليلى هجرة غيم
يحوم فى الغابة شان إنزل
بشارة فآل..
وضحكة نال..
وكلمة ريد مابتنقال
وبت فى البير هناك تنشل
ريدك ليلى جرة ميس
وسرحة طفلة قاعدة براها
تحسب فى بهائم ابليس
وفى السفاية تكتب ستة..
تكتب دستة..
تكتب مية .. حد أرقاما ما تكمل
وحدى تمل
ريدك ليلى غربة زول
فات مجبور عشان دينار
وعارف الرحمة بابا وسيع
وما بقفل
ولمن عاد .....
وبعد آهات ... بعد مده
من ود عينو للحلة ..
مسافة قصيرة من أحبابو هى التفصل
حت الشوق ... عشان الشوق
يطير سرعة
قبل كرعينو ماتحصل
بحبك ليلى بت العم
زى الغيم .. وزى البير
وزى الطفلة يوم تسرح
تعد دستة .. تعد ستة
وزى عربى البطانة هناآك
لما يشوف مراح ألبل
وآه ياليلى بت العم
إلفه معاها خفة دم
ده الخلانى من أعوام
أفتش فى كلام الريد
ويوم ألقاهو ابكم
وأفتش تانى من اول
ألقى عيونا هى المعجم
يجينى الرد..
خلاص يازول ..كفاك ياود
شيل عينيك من عينى
خلاص يازول بديت أفهم
وأنا العارفك فهمتى زمان
قبل عيونى تتكلم
وآه ياليلى زيك وين ؟
ومتلك كم ؟
لا بتعرف حدائق ابريل
ولا فى راسا شارع النيل
وحب الجامعة والتلفون
ماسمعتبو الا قليل
ومن ما تمغرب الواطة
على ناس بيتا تتلملم
وآهـ ياليلى زيك وين
ومتلك كم ؟...
جمال يوسف.. وعفة مريم العزراء
تواضع عيسى نبى الله ..
لما اتباعوا والفقراء
وشيتا فى الملايكة عدم
حضارة البندر المغشوشة
مابترحم .
تملا مشاعرك استغراب
اكان الزول عليك سلم.
ناس مشغوله بالعربات
ولبس الموضة والحفلات
وعمرو هناى .. وبت عجرم
حضارة البندر المغشوشه
حضارة زيف ملانة وهم
وحتي القمره ما قمره
هناك بالرملة مابتحلم
وغايتو البندر المجنون
عجيب أمرو .. وكتير بلخم
بنيتك ياوطن مسدار ...
ودابى الشونة كشكش
وفى الشدرة العلى البابور
هناك باليب سكن عشعش
بنيتك ياوطن تقنت
زريبة شوك.. وريحة قش
وتانى أردد المدخل
بنيتك ياوطن دوبيت..
طليتك منى لون أغبش
حرستك بالقوافى الصاح
لما تشوفلا زولا هش
بنيتك ياوطن واسوق
فتحتك فى العروق جدول
عرشتك فى رموش العين
فرشتك فى القليب مخمل
رسمتك فى خرائط الحب
بين الخلوة والمعمل
وآسف باوطن مليون
عليك العشرة ماتزعل
عشان ناس ليلى بت العم
خلاص بالباقى بس أقبل
لأنك ياوطن طيب
لأنك ياوطن أجمل

[/color][/font]

من طرف **بت الشاطئ** الإثنين ديسمبر 28, 2009 7:34 pm

[ندعوك للتسجيل في المنتدى أو التعريف بنفسك لمعاينة هذه الصورة]

من طرف **لوليتا** السبت ديسمبر 04, 2010 12:49 am

روووووووووووووووعة ،،
كلمات فتحت آفاق الخيال الذي من الصعب عليه التخيل ،،
وزاادتنا فخراً بوطننا العظيم،،
عشت ياسودان
لك كـــــــــــل الشكر والاحترام،،
تقبل مروري،،

وطن طيب

وطن طيب

ود الحبــر

رد: وطن طيب