مذكرات عاشف مفلس الجزء الاول

من طرف **abo sara** الجمعة يوليو 23, 2010 4:53 pm

شوف ما قلت ليك البت ام طاقيه بتوافق بيك؟؟

*******************************************

لم اكن املك الا الفين ونص , وكان تقسيمهم كالاتي

خمسمائه جنيه كيس صعود... وثلاثمائه مواصلات العربي حتي الاستاد .. وجريده لزوم التسليه بالطريق من ابو خمسمائه... والف وميتين هي قيمه حافله العيلفون .. تلك اذا هي الفين ونص كامله ليس فيها طريقه لكبايه شاي من اكرم ست شاي علما باني لابد من ان اتسكع امام احدي بائعات الشاي قبل تنفيد هدا المرسوم اليومي

وكان لابد من ايجاد خمسمائه جنيه لزوم كبايه الشاي . ولكن سيكون ذلك علي حساب الجريده . اذ ان خمسمائه البند الاول وهي كيس صعود لا مفر من تنفيذها

لمحت امراءه تجلس في ضل احدي الاشجار واتجهت اليها ظانا انها ست شاي . وعند اقترابي منها لم اجد امامها عده الشاي المعتاده وقلت في نفسي يمكن بتبيع شاي معلب او شاي حبوب المهم شاي

السلام عليكم يا ........... وهممت ان اقول يا حاجه ولكنني تذكرت موقفا حدث لي بمدينه بورسودان حينما سلمت علي احدي بائعات الشاي بكلمه يا حاجه فقد سمعت منها الاتي

سلام ياحاجه

تحج بجمل اعور انا شايفني بطوف في الكعبه ولا قدرك

طيب معليش يا بت انا غلطان

تبتبت في الشرك انا في نظرك بت

طيب معليش يا خاله

خلال الشوك شحدت ربي عليك يا راجل ما تختاني قبال ما احممك بالكفتريته دي

واستفدت من هدا الدرس المجاني والان لابد من اختيار عباره مناسبه لهده المرأة

سلام عليكم يا استاذه

انت معاي انا ؟

نعم يا استاذه ؟

ليه شا يفني واقفه في الطابور الصباحي ولا شيايله لي طبشيره

طيب اقول ليك شنو ؟

غايتو انا اديت العمره يعني ممكن تقول لي يا عمري

طيب سلام عليكم يا عمري

اتفضل اقعد ... طبعا قعدت ونسيت ان اخبركم انها ليست ست شاي انما وداعيه بالمشاهر ه

يا ربي دي ورطه شنو دي هسي تقول لي جيب البياض وجيب البلطي . وانا والله لا عندي ليها بياض ولا سواد كل العندي الفين ونص ومقسمات وما حايقات في سيدهم

اها خت بياضك ... بس تقول سمعتني وكان لابد من ان اؤاجل احدي الاشياء المذكوره اعلاه يعني الجريده كدا طارت وطبعا الشاي تلقائي طار اولا

توكلت علي الله الدي لا تضيع ودائعه ونفشت ريشي وطلعت خمسمائه جنيه

اجييي اجي اجي خجلت ليك . في شاب وسيم ولبيس وظريف زييك يخت ليهو لي شابه ظريفه زيي بس خمسمائه جنيه

ابري منها خجلي بري بري والله خجله

الله .... كدا معناها حا امشي الاستاد كداري ... بعد ما طار الصعوط والشاي والان حق المواصلات الداخيله يعني حا اديها الف جنيه

وتوكلت علي الله وهممت بان اخد الخمسمائه وادفع الالف جنيه واذا بها تحلف

حلفت بالله ما برجعن ولا بشيهنك شيله القروش من قدامي ما بتشبهك وحات سيدي ما بتشبهك اجي ابري منها شينه شيييينه

الله.............. كدا اضافه للاشياء الطائره سابقه الذكر كمان حق مواصلات العيلفون طارت .. والله دي لا بتتمشي كداري ولا حاجه ... دي ورطه شنو دي

ياعمري كدي اسمعيني دقيقه عشان .................

يمين ما بتشبهك ... اكان بتشبهك شيلها.. وانا اتيمنت ارمي ليك الودع مجانا مني لكن ابري منها ما بتشبهك اجيي اجي اجي

وختينا الالف جنيه ماسوفا عليها واصبح المبلغ المدفوع مهرا لكسب ود الوداعيه الف وخمسمائه بالتمام والكمال

طيب .... باقي لي في جيبي فقط الف جنيه لاغير والحافله بالف وميتين .. يعني اقول للكمساري انا نازل سوبا ياربي ؟

ولا اقول ليه طالب ؟ ياخي كدي لي بعدين ويحلها الف وميتين حلال

كدي طيب ارمي لينا ودعك دا خلينا النشوف الف جنيهنا اقصد النشوق بختنا دا كيف

ونواصل باذن الله
ابو ساره