مقتطفات من بساتين الحقيبة

من طرف **لوليتا** الأحد أكتوبر 10, 2010 5:15 pm

هل تدري يانعسان
للشاعر:محمد بشيرعتيق
ِ هل ندري يا نعسان انا طرفي ساهر
جسمي اضمحل بغرامك وانت زاهر
انا حالي ظاهر عاشق نبيل يا جميل ليك حبي طاهر
شاعر مجيد لغناك فنان و ماهر
بسحر دلالك وكرم خصالك علشان جمالك
اهوي القمر والنيل اهوي الازاهر
ليلي ونهاري لي حيك بهاجر
اخذني نورك يا ساحر المحاجر
ما بخشي لوم في هواك مابخشي زاجر
مهما الاقي من طول فراقي وفرط اشتياقي
و حافظ عهودك وحيات خدودك يا اللىّ هاجر
حسنك بديع يا وديع في عصرو نادر
حكّم صفاك مولاك ذو حكمة قادر
وانا برضو امل تعطف تجامل بمس الانامل
تشفي الجروح والروح و للقاي تبادر

حاول يخفي نفسو هل يخفى القمر في سماهو
أبدا وطبعا لأ
شفناهو شفناهو
حاول يخفي نفسو غير اتجاهو
سطع النور في افقو وكل هنسان رأهو
من البدر أشرق أشرق وكامل في علاهو
كل الزهر فتح من انفاس شزاهو
جزاب حسنو ناحع
لادن خلقه مايع
غتى البان مشيهو
تحب تنظر وشيهو
عيونك تختشيهو
من قوة ضياهو ومن شده حياهو
مرة اذا نظرتو ونظرك اليك رماهو
قلبك ينشرحلو وترتاح للقاهو
دون تشعر تحبو وتلهج بثناهو
مرة تقول كمالك
ومرة تقول كذالك
مرة تسمي سحرك
تغلب فيه أسمى وبرضو تشوفو أسمى

عيون الصيد
عيون الصيد ناعسات عيوني
عيون النيل حاكن عيوني
نسيت قلبي وروحي ونسوني
وفقدت الكانو يأنسوني
ليالي هناي جد عاكسوني
وأخاصم النوم كيف درسوني
مع الآلام هاجت شجوني
وأطبا الكون ما عالجوني
جفوا وبي نفورهم هيجوني
متين في الطيف يصبوا ويجوني
مقر أملي وفيهم ظنوني
يزيدوا دلال وتزيد جنوني
لذيذ تعذيبهم لو ضننوني
وصالهم آه.. راحتي ومنوني

الشادن المكحول قلبي يصبالو واخشي من لحظو ومن رمي نبالو
كم جريح اسهام عينو ضاربالو وبيها لا يدري ولا علي بالو
خصرو ناحل زاد جسمي انحالو وطرفو ناعس نام وطرفي يصحالو
الفريع السيل دمعي سحالو يانسيم ارجوك شوفو كيف حالو
في النجوم مرفوع مجدو ينبالو وبين سماك اعزل حظي مانالو
لو نظر محيو عاشقو جنالو ولو بسم دمع السحب حنالو
شوف لحاظو سيوف عاشقة هدالو وحرسو حولو يدور استعدالو
شوف خديد يلصف وحسنو يندالو البدر لو غاب يضوي في بدالو
قلبي همالو خديدك وجمالو معذب في هواك مالو
بدري حسنك لاح والقلوب مالو لي هواك وشوق قلبي عمالو
يافريع ياسمين متكي في رمالو قول لي عاشقك وين ضاعت آمالو
شعرو حاكي الغيم حاجبو هلالو فر بسمو غيم والبروق لالو
مافي مانع لو قتلي حلالو يفدي جوز تفاح صدرو لولالو
الجوهر الفرد الماتلقي مثالو ليه قلبي يلين وقلبو يقسالو

كـم نـظرنا هلال ماشاقنـا غيـر هلالو ماأظنو زلال يـروينا غـير زلالـو
اري الهـلال ينقـص واري محيو يتجلالو كل يوم يزداد في خديدو نور يحلالو
تتقاصـر الابصار عن حـسنو من اجلالو يـتيه يـصد باسم آه مـاألذ دلالـو
الـذّ شـي قربو بدل النـظر فـي جمالو وامـّر شـي بعدو وجفاه أو اهمالو
اري الغـصون بتمـيل واقول هـواهُ امالو علـي الخلاف واذا ميل علي انا مالو
طرفو ليه نعسـان وانا طرفي ليه يصحالو يـتلو آية الحب الفي الخديد لايحالو
دلالـو كـل مـا يزيد جسمي بيزيد انحالو ام قلبي الضاع خلي اليروح في حالو
اذا ادار لــحـظو عـلي جـبل دكّـالـو ولو بسم انزل دمـع السحاب ابكالو
وقلبو لا يشـفق علي عاشقو مهما شكالو حبيبي طبع الطير ينزل علي اشكالو
اذا ادرّ النـوح يـسـلب قـلوب عُـقّالو طبيعي فاهو خدار لا صبغة لا دقّالو
بالـراح والريـحان الله جـلّ ســقـالو دا شعرو ليل وجبينو البدرايه يبقالو
ولـي حـبيب ياليـل نـوم العيون قـلاّلو ولي حبيب ياليل قتل النفوس حلاّلو
ولي حبـيب ياناس اشـوف خدودو يلالو مع الظـلام تشـتاق الزهرة تتدلالو

لــحـــظـك الـجــراح اذايَ فـيـه وفــيه الـطـرب والـراح
مــنــايـا زهــرة الافــراح
للـــقــلــوب ســرّاح مبتعد شي عجيب مسجـون وعندو سراح
بيّ ضاق الكون لا اجدلو براح مـني فـارق وشال نوم عــيوني وراح
عـمـري اضـحـي مـبـاح في الغـرام لا اقـصد غير لـقاك اربـاح
سـرّي لـيــك يـُـبــاح وفي الظـلام تتـبسم وليـلي يبقي صباح
لـيــك مــغـرم صــاح ياخـلاصة حـسن العـجم والفــصّـاح
ــي جـنــون يـاصـاح مـن بـعادك هـل بي قربـك القي نصاح
جــيــش غــرامـك زاح هـدّ حـصـن المـهجة ولي دماي نزّاح
عـقـلــي كــاد يـنـزاح وقولـّي هــجرك جـد ياجافي ولاّ مزاح
لـيــك مــحـيّ وضّـاح وليك جـبين بي نـور ماء الجمال نضّاح
والـــدمــع فــضّــاح بي سـر غرامي البي تعلمبو دون ايضاح
تــعـبـت الاصــفــاح وطرفي جافي النوم من طيب عبيرو الفاح
بـيــن جــفـونو صفاح وفي بسيمو عقد الدر في صدرو جوز تفاح

ياجوهر صدر المحافل روحي معاك اتلطفيله
الغصن البتنى مايل طيره ينوح بي غصنه مايل
أهوى نسيم لي فكري شاتل الأسد الفي القيد يناتل
يتأكد ماليه كاتل غير مكحول ظبي النتيله
المرنوع بي كنفه هادل درعه يميل بي خصره جادل
أنا نايم والليل سادل شرط الحاكم يبقى عادل
مايمنع طيفك يغازل أنا في الحب لي روحي بازل
داخل قلبي ليك منازل يا لايم لاتبقى هازل
هل عاشق يسمع لعادل خلي نصيحتك عني زيله
يوقد شوقي ودمعي هامل جمر الحب لي جسمي شاعل
كيف لا تشعل في مشاعل لو الدهر بي حالي جاهل
في الأنجم أسأل سهيلة

غنى القمري على الغصون ذكرني الدر المصون
فريد عصره الما متله شىء
قمرنا الليك مطرف يصون يالغصن البزري الغصون
ملاك محروس داخل الحصون شمس الكون تشبه مشيه
فريد عصره الما متله شىء
قاسي سماع لهجه الحنون عظيم كالمال حلو كا البنون
بي لهجه يداوي الجنون شعاع محيه العين تختشيه
فريد عصره الما متله شىء
جميل متلك ما أظن يكون حيا ورقة وعفة وسكون
يالبدر الليه روحي كون في حسن الكون ما خلى شيء
فريد عصره الما متله شىء
ليك عالي العالم يهون يالرشا يا اللدن المصون
مناظرك فيك يتنزهون يالمطران مما مشيه
فريد عصره الما متله شىء

سيدة شباب الكون ومدينة احلامي انا بالغرام ممكون
ياروحي راعي روحي زاد وجدي طال هيامي
هاك شعوري ترجميه قبال تتم ايامي
مر يا نسيم الليل ما لي سواك دليل
شيل حبي وسلامي وسيب العزول مركون
فيك املي فيك حياتي وفيك التهاب غرامي
ليك في عذابي حكمه ولي في هواك مرامي
سهران حزين ووجيع والحب غذا الارواح
كل جيل بسلمو جيل
وبعد انتها الاجيال في قبري ليها سكون
عاودني يانسام في عودتك مرامي
تشفيني اخبارك اصبحت قلبي دامي
سهران وجسمي عليل وليك السياده براك
اسرني بي التدليل ومهما اقاسي معاك
انا برضي ليك اكون

انـت حـكمة
انـت آيـة و لاّ انـسـان
انت صاحي ولاّنايم ولاّ طرفك من طبعو نعسان
انـت راحي
انـت روحـي
انـت انسان عـيـنـي يـا صــاحي وانـت احـسـان
انـت نـادي
انـت هـادي
انت ميسان
انـت ظـافـر
انت ضـافر اسـود وفـرسان
انـت شـادن
انـت لادن
انـت فـتّـان
انـت ضـامر
انـت سـامر
انـت هـتّـان
انـت نـادر
انـت نـاضر
انـت بستان
انـت صـافي
انـت نـافي زور و بـهـتان

كيف لا اعشق جمالك
ما رأت عيناى مثالك.. و كيف لا اعشق جمالك
كيف لا اعشق جمالك ..و انت مغرى
زنت بى ادبك جمالك..و انت سحرى
فيك اجمل شي خصالك..و انت بدرى
و ابعد الغايات منالك
لو رنيت ترسل نبالك
قلبى لاعب بيهو مالك
ليهو حق لو كان هوانك
و كيف لا اعشق جمالك
بسمتك توحى الاغانى
و اسمى ايات المعانى
فى هواك لاقيت هوانى..و بيهو راضى
معتلى قلبى و لسان
انت ذى زهر الخميلة
تزدهر فى روح جميلة
و عاليه اخلاقك نبيلة
و يخجل البدرين هلالك
و كيف لا اعشق جمالك..
انت رافل فى نعيمك
و بس انال منك جحيمك
و قول لى كيف اظفر بليمك
نارى تطفا..روحى ترفا
فى سما العز ذى كماك
كيف لا اعشق جماك

ليه شجرة الفل ياخى منشرحة
والورود بالمر لونة ليه احمر كانه منجرحة
شوف طيور منظوم روقة زى سبحة
طايرة كالامال فى الفضاء سابحة
فى جوارنا قريب ظلالها جات شايحة
ياخى ما فايتات اظنهن بايتات وفى الرياض صابحة
النسايم لو غادية او رايحة
بى ندى الازهار و العبير فايحة
و الفروع بتميل بالطرب مايحة
و السواقى تئن بى نغمة الحن صوتها كالنائحة
منظر البدرى و بهجته الفاضحة
تبدو ليك فى النيل كالدرر واضحة
و الطيور تختال فى الغصون صادحة
و السرور ميل روق و اتخيل كفتة الراجحة
عير كلامى معاك ياجميل لمحة
قوم معاى و ميل قامتك السمحة
كل شىء ميسور والظروف سامحة
منظر النوار يغنى عن انوار ولى الظلام يمحى
ديك شواطى النيل بالسرور طافحة
لابسة بدرى التم وللنجوم لافحة
شتلة الياسمين مايلة بصفحة
ميلها بيشجيك و من شذاها يجيك كل حين نفحة
شوف وجوه الروض باسمة منطرحة
وتضحك الازهار ميتة بى الفرحة

زاد ازاي لعبيد عبد الرحمن :
زاد أذاي يا صاحي واعتراني نحول
طرفي دامع وصاحي وبالسهاد مكحول
لي حال الحول
والمغالق بينى وبين حبيبي تحول
قلبي قال ممحول
صبري ضاع وياجافي وخصمي صار ممحول
العلي ما بزول والأنين يابدري والحنين مابزول
الجسيم مهزول
منيتي وآمالي ونومي فيه النول
يانسيم مرسول لي حبيبي
لعلك منو عالي تنول
أمشو ليهو مثول
علّي أنظر حسنه أقبّل المعسول
يافضول أقول رفعة قامته
وحسنه وصفه شرحه يطول
من ندى المسطول
كم يواعد ويمطل يومي طال ممطول
القوام معدول
والوريد كالدمية والأسيس مسلول
الكتيف مهدول
بعضه نام في بعضه تقول حرير مجدول
ايه يفيد القول
وايه يفيد من شعري فيه مهما أقول
منه حالمة عقول
الوصول للبدر ياخي ما معقول
زاد أذاي يا صاحي واعتراني نحول
طرفي دامع وصاحي وبالسهاد مكحول

صالح عبد السيد (و المعروف بأبو صلاح)
يا ليل أبقى لي شاهد
بصوت الفنان الراحل القامة عبد العزيز محمد داؤود
يـاليل ابقالي شاهد علي نار شوقي وجنوني
ياليل صار ليك معاهد طرفي اللي منامي زاهد
ده انااللي شهري اشاهد فوق لي نجمك ظنوني
يـاجميل لي سهري واجد واراك نايم وهاجد
بـين لـي عيني ناجد بي دموعي غرقوني
لاتـكون بـالنظر جاحد حلمك في الميه واحد
مـنك لـي قـلبي شاحد بين ايديا ياحنوني
خـده البي مطارقه فاصد جامع كل المقاصد
طـرفه الكحول وراصد بي سهامو لالموني
بـراق سـنك يـساعد الـغيم المزنه راعد
سـاكن قلبي ومباعد تشتاق شوفتك عيوني
حـبك في الجوف يطارد مابين صادر ووارد
يـاحبيبي الـلي فـارد نـظراتك يـأسروني

ياعازة الفراق بي طال
ياعازة الفراق بي طال وسال سيل الدمع هطال
طريت برق الفويطر الشال وساح دمعي البكب وشال
كمل صبري ومنامي انشال لبس من ناري عمه وشال
ارض امالي في امحال ومن الهم بقيت في اوحال
وبعدك عزه ساء الحال منامي وصبري اضحي محال
حليل الناسا وناس طريت ام در حليل ناسا
وكيف انساها واتناسا ومفتون بي ظبي ناسا
ولع جوفي جمري الحي وما بتطفيه
فيا زينة ربوع الحي لي دياركم يعود الحي
ياعازة الفراق بي طال

مسوا نوركم
شوفو المن جبينا صباح
الصباح إن لاح .. لافائدة في المصباح
هل أتاك حديث الكوكب النضاح
قمره تمطر خمره وحارسها الفضاح
لو تحيجنا محاسن الشمس للإيضاح
مابتحيجنا محاسن محيها الوضاح
*****
نور جمالها دهشنا معشر الفصاح
بين ناطق صامت وبين صامت صاح
غانية غالية محاسن فيها شوف ياصاح
الجمال الفيها كل معنآ صاح
ننظر الأيات من نور على ألالواح
المعاني الخرد ومنية الأرواح
في العيون المرض السحرن لواح
يجذب الألباب ويفرح النواح
*****
القوام اللادن و الأريج الفاح
من جسيمها الناعم الأثمر التفاح
خلا عقلي وخلا في حشاي كفاح
جيش هواها أحتل قلعة الأصفاح
روضة غناء جمالها يجلب الأفراح
وحورها من الجنة فيها تسقيك راح
كل هذا تراه مابيزيل أتراح
من يحبه تهالك أستراح وراح
********
يا ليالى أحبابي ماشفيتي جراح
بل شقيتي فؤادي بمدية الجراح
صرت أتلو حديثك في الوجود بصراح
لوتليتبو كتابي سميت بالشراح
فيك نظرنا مناظر يعلم الفتاح
لوقفلنا قلوبنا كانت لها المفتاح
أدرى أو لا أدري صرت كاللمتاح
لورضاك هلاكي أنا للهلاك أرتاح
*****
ماجنيت في هواك وماعلي جناح
أشتكيت للقمري لو يعيرني جناح
يكفيك لساني الغنى فيك وليك كم ناح
لورثيت به حياتي ماإحتجت لي مناح

الفي دلالو وما اعظم جلالو استحل هلاكي ولي حرم حلالو
الهلال الشغل الناس هلالو الظلام حين شاف محيو انجلالو
ناضرة خدودو بالانوار يلالو اراح انفسنا بريحانة خلالو
المحجب مااكرم خصالو لي كاتل وليه صعبان وصالو
حسنو نامي ومافي انسان حصالو خلف حجبو بق النور عصالو
المحاسن في مراية جمالو رطب قوامو وخمر التيه امالو
يتلو قلبك حين تلة شمالو وتدعيلو عليه يدوم كمالو
المهفهف توب العز كسالو مثالو النعمة ومااسعد مثالو
جدايل ديسو الفي وردانو سالو وطيبو يعبق كل ما الليل مسالو
شالو فالو الناس يتمنو حالو مثال الباسم وحن الغيم سحالو
من ضميري حب الغير محالو ونام وخلي الكان نايم صحالو
الطريف السبي قلبي وصبالو لو رآه الكان راهب صبالو
الاشعة تشوفن في قبالو ولو نظرلك بتشيلك نبالو
مابيرحم قلبي الماخطالو وصد نافر وزاد الصد وصالو
احب في سماهو المافي ايادي طالو وعندي افضل من وفا ناس نصالو

كلمات محمد علي عبد الله الأمي
غرد يا حمام أسمعني واشجيني بذكرة الأحباب بالله ناجيني
رحماك نجيني من دي الهموم البي من قاع سجين
خلي الهنا يجيني وخلي السرور يصبح في طيه زاجيني
تبريحي صاليني وهيامي زاد أضعاف ومنامي ساليني
قول انت سليني خلي اليزول عني ألمي المواليني
أنا شوقي ماليني والبين برى جسدي بنوايبه باليني
يا دمعه بليني ويا قسوة الأيام فتي الحدود ليني
مين غيرك يشفيني ومين غيرك انت يعيد صبري المجافيني
قول ليه صافيني زمني القصد هجري في هاوية خافيني
غاب رشدي أهديني في ملتقى النيلين اتغني أشديني
على توتي عديني تجد الأدب فطري وتجد الحيا الديني
صابحني ماسيني يا جالب الأفراح لا تبقى ناسيني
سجعك يواسيني ورجايا فيك يا حمام يوم موتي ترثيني
صعد وناديني و أقصد رياض شمبات طير بي وديني
في غناك أفديني و اندب هناك حظي وسعدي المعاديني
بطرى البساتين وبطرى الشذى الفواح والمسك والتين
يا جنه فتيني هل بعد هذا رجوع ؟ يا حظي أفتيني
ان رمت ترويني مروى العطيش في اب روف. بجرعه داويني
في جوفي كاويني حب الفريد في أم در من قبل تكويني

حليل زمن الصبا
حليل زمن الصبا اماضى وحليل زمن الحياة الزاهر
حليل زمن الحبيب راضى وحليل زمن الهوى الطاهر
حليلو الابلج الباسم حليلو الكاحل الناير
حليل قمر السما الباسم ليليه وصبح داير
آه لو آه تفيد مجروح والمثل القديم ساير
رهاب ماحصلوا الجارى وسماك ماحصلو الطاير
تجدنى مراقب اخبارك اذا النسمات بها تخابر
تجدنى على الفراش مضنى وتجدنى على الاسى صابر
انا البعدك اصون عهدك وليتك كنته بى خابر
ولقيتك مرة تذكرنى ولو فى ذكرة الغابر
فداك نوم عينى يانايم وهل بلغك انا مساهر
زمنا الكنا لاندرى بما كان الزمن ضامر

ضـيع فـي هـواك يامـهفهف حرام ومـاذنبي عـندك خـلاف الغرام
حـبيب قـلبي زاد الفـؤاد انــضرام يسـيل دمـعي لي ذكركم باحترام
وغـير قـربكم يـاخِـلّي مـالي مُرام وقـرب المحـب من شئون الكرام
بـنورك شـهير في الخلوق زي عـلم تقيد من شـعاعك كواكـب الظلم
مـحال اصـطنت لـي عـزولك كـلام اضـيع في هـواك يابديع والسلام
جمـيل خصـرو سـادل عليه الغـمام يجاذبو النسيم في المرور كالزمام
يمـيل بـالشـمال والجـنـوب والامـام يكـاد ان يرك فوق غصنو الحمام
جـميل يصـطحب لحظو لي روحي سهام يبُـق نورعقيد فاطرو في الابتسام

انه المجروح ... للشعار سيد عبد العزيز ...
انة المجروح
يا أنة المجروح
يالروح حياتك روح
الحب فيك يا جميل
معنى الجمال مشروح
للحب لهيب فى الجوف زى الزناد مقدوح
منه الجبابرة تلين لصوت بلابل الدوح
وتصاحبو النسمات تفضل معاها تدوح
بين نغمة الأشواق ومحاسن الممدوح
الناس تحب رؤياك بالخاطر المشروح
حورية فى السودان بحبى ليكى أبوح
يا عنب جناين النيل أتمنى منه صبوح
وانشد فؤادى الضال بين الرياض مذبوح
وأرى الهلال فى ظلال تلك الخميلة يلوح
أنا لو ضمنت رضاك اكون سعيد ممنوح
يا من تسر رؤياك تفرح وتنسى النوح
تكسى النهار بجمال خديك جمال ووضوح
منه الغزالة تقيف فى موقف المفضوح
من الوله للقاك دمعى الغزير مسفوح
ناقم على الأيام مع أنه طبعى صفوح
انا والخيال فى جدال وانت بنداك منفوح
كل ما النسيم يغشاك زى الحديقة تفوح
رايق كحيل نعسان انسان رقيق وجموح
ساحر العيون بجمال فى سواك ما مملوح
ان كان تميس بنميس ان كان تموج بنموج
عدل الطبية جعل جور الحبيب مسموح
يا ملفت الأنظار يابسمة المفروح
وانا أهدى ليك الحب حب من فؤاد مجروح
حب الشحيح للمال حب الجبان للروح

فلق الصباح
فَلَق الصباح قـول لى
أهـو نورك لاح خِلِّى
يا خفيــف الــروح
هــو هـــذا نـداك
أم نــدى الأزهــار
من جنان رضـوان أصلك
لـذا كـل ربيع فصلك
اتـنـفــس فــوح
تتـنـفــس نـــاس
وريـــاض وبحـــار
ما ألذّ نسيـم وصلــك
مـا رأيت يا جميل مثلك
يـا بليــل السُّــوح
هــو هـــذا نــداك
أم هـوى الأسحــار
أنت روضة وليك زهرة
وله كوكب وليك بهرة
ضمخــوك للجبيــــر
زعفران وعبيـــر
إنتَ نـار فـى بهــار
صَبّـغْ الخـدين حُمرة
بعد ساعة بتشوف صفرة
الاصفـرار ده كتيـر
أخجلـوك يـا أميـر
ولّــه نُمّــت نهـار
صبح البُستـان شايل
شجـر الرمـان مايل

السُــلافْ فى الدِنـــان
والكنـــار فى حنـــان
والهِــزار فى هِــــزار
إنتَ كالطـاووس خــائـل
كبرياءك وفيـك خــايل
انـزل انـــت كمـــان
غـّن قـول يـا زمـــان
ويـــن حبـيـبــى آذار
مــا عرفنا عدوك زاهــل
ولَّـه لِسَّـه غُـــلام جاهل
مُتَهـــلل صيـــــف
شِتـــا عنــدك كيـــف
فــى اللـــعب بالنــار
فـى لهيبــك أشـوف ساحل
كالفــراشة أجيــك راحل
أنــا خــــايف كيـــف
يــا لطيـــف الطيـف
أهــوى وابقــى فـى نــار
فلــق الصبــاح نّـــوَّر
لــى نحــور الغِيــد صَـوَّر
جميعَـــنْ فـى الـــدور
خــدود وبـــــدور
صَــدَفَـــه و مُحَّـــارْ
عَـزَّة شُـوفى الحــوش نوَّر
بــى نجــوم الليـــل غَـوَّر
يـــا صبــاح النــــور
علـــى العيـــون الحـــورْ
والخـــديـــد الحــــار
عَــزَّة قـومى كفـاك نـومك
وكفــانــا دلال يـــــومكْ
إنـت يــا الكبـــرتــوك
البنـــات فــاتــــــوكْ
فــى القطــار الطـــار

قائد الاسطول
يا قائد الأسطول تخضع لك الفرسان
ياذو الفخار والطول أرحم بنى الإنسان
مين لسماك يطول ما يطولك اللمسان
معناك شرحه يطول والله يا إنسان
أصدق كفانا مطول ياذو الحسن إحسان
أنا عقلى بيك مختول والناس عقول ولسان
ما بنكر المعقول آمنت بالأيمان
بالطلسم المصقول بدل لخوفى أمان
بالنور سحرت عقول كانت صميمة زمان
يا من تحق القول قتل النفوس حرمان
وما الجندى والمكتول و طالب الغفران
من أيده راح منتول واتوهد النيران
فاقد الصواب مبتول مما رأى حيران
أصبح زهر مشتول وفاح ملا الجيران
يا علة المعلول كم أومى ليك بنان
كم من أٍسير مغلول مالاقى فى لحظة حنان
يرى وعدك المحلول زى حجة الوسنان
والكان سكونه تلول ما ببدلهم بجنان
يا حبيبي كون ممهول وليكون ماكان
الفى غد مجهول والماضى أسمه الكان
نفديك شباب وكهول ونبقى ليك أركان
فى حبك المأهول ونخدم السكان
يالفى سماك مفصول تنشاف عيان وبيان
ما عرفنا ليك وصول وما دنيت أحيان
إنت الخطاك أصول يعلم الديان
مثلت فينا فصول ما بدرسها النسيان

في الطيف او في الصحيان
شعر :عمر البنا
لحن وغناء:كرومه
في الطيف او في الصحيان زورني ياحبيبي انا عيان
******
مالو لو في بعض الاحيان **تسمح لي صحوا اراك عيان
تاخذ ياحبيبي عن حالي بيان ** عسي تبقي قلوبنا في الغرام سيان
***********
يافريد الحسن وهجة امدرمان** لي من شوفتك يا حبيبي زمان
انا ساهر ونوم عيني حرمان **وانت بين اترابك في نعيم وامان
***********
النحول علي جسمي يا حبيبي بان** وانت جسمك نامي وبالنعيم طربان
لوراك الناسك المن الله جبان** بيك يفتن ويصبح بالغرام تعبان
***********

اذكرينى يا حمامة
كتبت بأم درمان سنة 1940-
كلمات محمد بشير عتيق
لحن وغناء عبد الحميد يوسف
أذكرينى يا حمامة كلما ساجع ترنم بي هواي وحب جمالك
كلما هطلت غمامة******أذكرينى يا حمامة
فى مسائك أو فى صباحك
وفي غدوك أو فى رواحك
وكلما بارق تبسم أو نسيم الصبح نسم
عني دايماً يكون سؤالك
******
فيم هجراني وعلام******يا الهواك صار لى علامة
شاهرة لى دايماً سلاحك******وموتي واجب فى اصطلاحك
طرفى عن رؤياك يُحْرَم******وذنبى إيه غير أني مُغْرَم
ولي هواك من بدرى مالك
******

سألته عن فؤادي
سألته عن فؤادى وعن سبب هيامه
أجابني ما هو عارف
عشقته وجماله نظمته فى فنونى
جفانى صدى عنى تركنى لشجونى
اذا تلاشى صبر وترعرت جنونى
واذا أنبرى فؤادى لعهدى ما بخالف
حبيبى يا مدلل بحق صفا كمالك
حرمتنى وصالك وملت عنى مالك
أنا صريع محاسنك وانا أٍير جمالك
تعال شوف تعال زفيرى والعواطف
يا فرحة الحزانى ويا زينة المواكب
يا ربرب الخميلة ويا زهرة الكواكب
زمانى جار معاك وهاهو لى ناكب
بعدك الصلانى يادرة المعارف

مع كل الـــــود،،،

من طرف **احمد** الأربعاء أكتوبر 13, 2010 7:38 am

غانية غالية محاسن فيها شوف ياصاح
الجمال الفيها كل معنآ صاح
ننظر الأيات من نور على ألالواح
المعاني الخرد ومنية الأرواح
في العيون المرض السحرن لواح
يجذب الألباب ويفرح النواح

مروري من ما قرأت
فتقبليه
احمد

من طرف **لوليتا** الأربعاء أكتوبر 13, 2010 9:07 am

مرورك زاد المكان تألقاً،،
تحياتي،،

مقتطفات من بساتين الحقيبة

مقتطفات من بساتين الحقيبة

رد: مقتطفات من بساتين الحقيبة

رد: مقتطفات من بساتين الحقيبة