نصيحه للبنات عشان ما يزعلوا من نصيحة الاولاد

نصيحة ام بتوصي في بتها
هووووووووي.."يا بت هوي فتحي عينك وأبقي نجيضة وفالحة..... قدر ما أجي داخله عليكم ألقاكي.... هي هي هي .... وقِر قِر قِر ..... تضحكي مع عبد الله دا.... الراجل ما تضحكي ليهو كتير..... يسعلني الله يحقر بك....الراجل أديهو العين الحمرا.... وإن قدرتي لعند إيدك تلحقيها ليهو لحقيها...أبقي نجيضة.....أيه..... زي أمك.....الله بسعلني وقت أبوكي يقول حاجة تضحِّك.... أمشي أتحشر في الأوضة وأضحك زين وأجي مارقة صارة وشي.. واللا أعاين لو وأقول لو" هي.. بس... زح غادي".....وبعدين أوعك ثم أوعك ثم أيضاً أوعك... تقولي لو الجلابية دي سمحة واللاّ العمة اللابسها دي سمحة... نفسو تقوم تعجبو يعرس فوقك.... وبعدين تشربي ما تروي....وجننيهو بالطلبات.. استعملي معاهو سياسة التجفيف.... أوعى تخلي لك قرش يبيت في جيبو...وأوعك تخليهو يشوف المسلسلات.... بيخربن الرجال.... وقت المسلسل داك.... شفتي جيبي فندكك...وأقعدي دقي أي حاجة جنبو ويا ريت لوكانت شطة... واللاّ كان عندك شافع بيرضع وجيعان وبيبكي خليهو في بكاهو داك لمن المسلسل ينتهي....وبعدين ما يجي داخل يلقاكي تغني ......حتى إن بقيتي دايرة تغني.... أوعك من الغُنا البيخليهو يفتكر أنو هو المقصود.. ناس حبيبي حبيبي.... أمسكي في الغنا الحار...... زي البيجري نسيبتو ومرتو طلقانة......واللاّ أندب حظي أم أمالي...... واللاّ دفاعنا الشعبي ياهو ديل.....واللاّ النار ولعت بقلبي بطفيها..... اااااااااااي.... عشان تربي لو الزلعة .....والخلعة....بس أوعك تغني لو الليلة يوم الرجال وخصوصاً يوم الخميس.... بيقوم يصدق ويتحنفش فوقك ساكت........ وأوعك تشكري لو حاجة جابها.... إن جاب لك لحم.... ختي إيدك فوق راسك...وقولي لو وب علي وب علي وب علي....غشوك وأدوك الجلافيط.....وإن جاب لك فتيل ريحة...أول ما تفتحيهو... وتشميهو.... طوالي كشري وقبلي غادي وأبصقي..... وقول لي لو..... دا شنو يا عبدالله؟...... الريحة المتل ريحة الفسيخ دي جايبها من وين؟......غايتو إنت مغستك تقد... أصلك من يومك الجدعت فوق حبلك دا وكشحت فوقي الفاتحة ما جبت شيتن فيهو فائدة....... وإن جنك نسوان والله بنات....ما تخليهو يقعد وسطن....ويتونس.... طيريهو من البيت....وإن أبى يمرق... قدرما يقولو نكته والله يخفف دمو قدامن صُري ليهو وشِك.... وقول لي لو إنت يا عبد الله ما عندك غير النكتة دي؟ يا خي عملت لنا بها وجع... وش......أصلهم الرجال عارفاهم... الواحد فيهم من يشوف لو لمت بنات يقعد يخفف في دمو ويعمل فيها ودنفاش .....وتلقيهو يضحك بلا سبب... حتى إن واحدة قحت ساكت... يقعد يضحك ويصفق إديهو....وأوعك تخليهو معاهن وتدخلي المطبخ تسوي لك شربات...... وحات الله بنات الزمن دا إن غفلتِ من راجلك دقيقة بس تلقيها عرستو